Plan de sostenibilidá turística en destín Gozón. Con vistes al norte del norte.

CONVENIU ENTRE LA CONSEYERÍA DE PRESIDENCIA, RETU DEMOGRÁFICU, IGUALDÁ Y TURISMU DEL PRINCIPÁU D’ASTURIES Y EL CONCEYU DE GOZÓN, PA LA EXECUCIÓN DEL PLAN DE SOSTENIBILIDÁ TURÍSTICA EN DESTÍN GOZÓN, CORRESPONDIENTE AL PLAN DE SOSTENIBILIDÁ TURÍSTICA EN DESTÍN DEL PRINCIPÁU D’ASTURIES 2022, FINANCIÁU CON FONDOS DE LA XUNIÓN EUROPEA – NEXT GENERATION EU.

El Plan de Sostenibilidá Turística en Destín Gozón ye l’instrumentu estratéxicu que guía’l desenvolvimientu turísticu del conceyu dende criterios d’equilibriu territorial, competitividá y responsabilidá ambiental. La so finalidá ye consolidar un modelu turísticu sostenible, axustáu a la identidá, el paisaxe y la realidá social de Gozón.
Como subidentidá integrada na marca turística Gozón, el Plan de Sostenibilidá Turística en Destín Gozón representa la so dimensión planificadora ya institucional. Mentanto la marca proyeuta’l destín, el plan define la fueya de ruta que guía la so evolución futura, garantizando coherencia, orde y visión a mediu y llargu plazu.

El claim “Con vistes al norte del norte” resume esta mirada estratéxica. Non solo alude a la posición xeográfica singular de Gozón, sinón tamién a una actitú: anticipase, planificar y avanzar con perspectiva. La sostenibilidá entiéndese asina como un compromisu estructural, non como un elementu accesoriu.

El Plan ta organizáu alredor de cuatro grandes exes: Exe 1. Transición verde y sostenible: dirixíu a la adecuación de caminos ya infraestructures y la restauración paisaxística d’espacios, obres y equipamientos; Exe 2. Meyora de la eficiencia enerxética: persigue la meyora na movilidá y caminabilidá del destín, y la contribución a la mitigación del cambiu climáticu; Exe 3. Transición dixital: busca la meyora de los procesos al traviés del usu de la tecnoloxía; Exe 4. Competitividá: comprende actuaciones pa crear y potenciar nuevos equipamientos nel destín y acciones venceyaes cola meyora constante de la xestión del destín.