GO→North | Muévete cola fuercia del norte
El Norte nun ye namái un puntu cardinal; ye una forma d’estar nel mundu y de mirar al horizonte: honesta, robusta, indómita y auténtica. En Gozón, esa identidá única vívese na hospitalidá incondicional de la so xente, nel cruxir de los barcos amarraos nel puertu y nel ritmu cotidianu de villes marineres que se nieguen a perder la so alma.
Siente'l pulsu marineru Lluancu, villa de mar:
pasia ensin priesa pol so Cascu Históricu, visita la maxestuosa Ilesia de Santa María, que los sos muros centenarios casi besen les oles del Cantábricu y contempla la silueta de la Torre del Reló. Lluancu ye un nucleu urbanu con un encantu magnéticu que naz direutamente de la so historia viva, de les sos calles empedraes y de la so estrecha rellación coles marees.
Muséu Marítimu d'Asturies:
una parada dafechu imprescindible na villa pa comprender l’alma de Gozón y l’ADN de los sos habitantes. Un viaxe fascinante al traviés del tiempu pola construcción naval, la carpintería de ribera, les artes de pesca tradicionales y la rellación milenaria, dura y apasionada d’esti pueblu cola mar Cantábrica. Un legáu que llate con fuercia inclusu en feches especiales gracies a iniciatives culturales como les máxiques Nueches del Muséu demientres la Navidá.
Axenda y tradición:
baxo’l cielu del Norte, la cultura contemporánea y la tradición más pura fúndense n’eventos memorables. Siente la devoción de la Selmana Santa col sobrecoyedor cantar de Los Callandinos el Vienres Santu y la procesión de La Venia’l Domingu de Resurrección. Nel branu, déxate seducir pol encantu de les Nueches de Veles y Estrelles —coles sos actuaciones musicales temátiques na Plaza de la Torre del Reló— o pol desbordante inxeniu del Antroxu de Branu. Too ello regáu col sabor del Cantábricu nes sos cites gastronómiques imprescindibles: el Festival del Bonitu, la Sardina de Cardo o la tradicional Calderada de pexes de roca.
¿Cómo quies vivilo?
Un cientu d'esperiencies
