Centru d’Interpretación Paisaje Protexíu Cabu de Peñes
El Gobiernu del Principáu d’Asturies y el Conceyu de Gozón xunen esfuerzos p’abrir al públicu’l Centru d’Interpretación del Paisaxe Protexíu del Cabu Peñes.
Cabu Peñes: emplazamientu estratéxicu
La Marina construyó a lo llargo de tola costa española una rede de puestos de vixilancia y control marítimu nos sos enclaves más estratéxicos. Cola llegada de les nueves teunoloxíes y de los satélites espaciales, estes instalaciones militares queden obsoletes, pero constitúin unos puntos privilexaos pa la observación del paisaxe.
L’antiguu “semáforu” asítiase nel Cabu Peñes, paisaxe natural protexíu pol so altu valor mediambiental. Depués de quedar abandonáu y nun estáu ruinosu, rehabilítase como centru de receición de visites turístiques y d’esplicación de la flora y la fauna del entornu.
Valores ambientales
Equipamientu destináu a interpretar y divulgar los valores ambientales del Paisaxe Protexíu del Cabu Peñes, el puntu más septentrional del Principáu d’Asturies y ún de los ecosistemes costeros más singulares de la rexón.
Atópase na rasa costera cercana al estremu del Cabu Peñes y alluga una esposición permanente sobre les carauterístiques naturales d’esti espaciu, amás d’otros conteníos rellacionaos cola contaminación costera.
L’equipamientu, que forma parte de la Rede Natural d’Asturies, va poder visitase en Selmana Santa y na temporada braniega.
L’horizonte: protagonista del paisaxe en Cabu Peñes
La sensación d’infinitu d’esti paisaxe, dramáticamente abiertu a la mar y abiertu al horizonte, ye la clave que da sentíu a l’actuación. Plantegamos una rehabilitación que nos faiga pensar na arquiteutura como definición de llendes, un edificiu que se sincroniza col entornu, que se funde con él, pa que’l visitante perciba la fuercia y el calter del paisaxe, inclusive nos díes de mala climatoloxía. Plantegamos un observatoriu p’abrir l’edificiu al horizonte y incorporar l’horizonte al edificiu.
Observatoriu del paisaxe
L’edificiu divídese claramente en dos plantes diferenciaes. La planta baxa vertebra alredor d’un espaciu central de receición, aislláu del paisaxe pero ilumináu cenitalmente. La planta cimera plantégase como un puntu d’observación d’esi paisaxe, de la flora y de la fauna que s’esponen dientro del edificiu. Mientres que na planta baxa se capturen “intres” del entornu al traviés de buecos, na planta cimera l’edificiu ábrese dafechu al paisaxe. La fachada busca desmaterializase pa que la llende verdadera del edificiu seya l’horizonte.
La lluz: nexu d’unión ente dambes plantes
La sección xerarquiza l’edificiu. La rellación ente toles partes del edificiu prodúzse al traviés del mecanismu qu’introduz la lluz hasta l’interior. El sistema de llucernarios que traviesa la planta cimera modula les zones d’esposiciones, lo que facilita’l so usu y la so compartimentación.
